Op donderdag 27 mei 2021 ondertekenden Rita Rahman, voorzitter van de Werkgroep Caraïbische Letteren, en... Lees verder →
Posts tagged with: Lannoy Mavis de
In memoriam Mavis de Lannoy (1932-2011)
Diskurso na okashon di seremonia di entiero di Mavis Josephine de Lannoy-Berg
24-08-1932 / 08-03-2011
pronunsiá pa Lucille Berry-Haseth
na misa di Janwe, djamars 15-03-2011, 3.15 pm
Kara pa morto nos ta realisá kada be di nobo ku morto a bini pa nos tur, pero nos ku awe a keda, ta mira ademas Mavis su logronan manera un monumento ku lo t’ei te dia solo fria.
Amigu i konosínan, famianan, tur Mavis su hendenan stimá, Dudi, Linchi. Su prendanan presioso: Aimée, Noëmie, Michel, Jean-Philippe, Luigi, pabien ku ta Mavis ta boso mama.
Ta bon ku durante e amistat entre Mavis ku mi – amistat ku a nase na prinsipio di dékada sesenta na radio Curom – nos no tabata sa ken lo a papia na despedida di otro. Aki ratu manera e aviso den korant ta mustra, nos lo lesa tambe riba Mae su tumba, su fecha di nasementu i su fecha di despedida. I e elemento mas importante ta e strepi meimei di e fechanan ei. E strepi ku lo por konta kiko a pasa tur e 78 añanan i piku, kon e añanan ei a pasa, i ki marka nan a laga pa posteridat. Mi Chimé a warda su agèndanan ku anotashon tambe di e rekuerdonan di su bida pa su famia, ku por ta orguyoso di nan mama, nan wela, nan ruman, tanta, suegra i kuñá.
Ora hende bai fo’i mundu ta sirkulá hopi komentario rònt di nan. Kada ken ta usa un otro vokabulario. E dianan akí tur komentario den kaso di Mavis su despedida a resultá entre otro den: ‘E señora ei… un dama elegante, pèrtinènt, serio, na su punto, papia nèchi…, sivilisá… na nivel.’ Ta bèrdè. Mi amiga Mavis semper a gosa di presta ‘na nivel’ den tur loke e organisá, tur loke e hasi. Su filosofia tabata: trese bèrdat sunú, sin fraña, sin hipokresia, nèchi presentá sí. I e tabata bon dokumentá, un persona krítiko, ku e debido midí pa dekoro.
Mavis ta hende di pariba. I fiel na su bario ‘VolksBond’, Pader Loduvicus Jansenstraat/ Oranjestraat, el a sostené di manera partikular e inisiativa di e habitantenan kontemporáneo di selebrá dia di Bandera den su Bario di infansia i adolesensia. E tabata konvensí ku e núkleo bario ta esensial den hende su bida i na vários okashon el a splika via medionan di komunikashon importansia di e konvivensia ku rèspèt i sentido di kompromiso ku otro. Su hendenan di ‘Bond’ lo sinti su falta komo konsehero, amiga i maestro di seremonia.
Ta bon pa banda di e inkontabel eventonan kultural ku Mavis a organisá trahando na CCC, na RVD, e programanan informativo di gobièrnu na televishon, su trabou komo lokutor na Curom…, menshoná tambe al ménos sinku obra grandi ku el a realisá: buki di protokòl pa ministernan, buki di hubileo di Orfeon Crescendo, buki biográfiko di Sr. Juancho Evertsz (Seis ménos un ta sero), buki tokante bida i trabou di señora Lucina da Costa Gómez (Di bèrdè bèrdè) i e seri pa televishon ‘In Holland staat een huis’. El a traha tur trabou ku lealtat i profeshonalismo pa yega na e meta proyektá, e kousa kolektivo.
Bon komunikashon tabata haltu den su pal’i bandera. Si el a primintí ku e ta hasi algu, bo por a konta ku ya esei ta hasí kaba. Mavis tabata intensamente aktivo. Na lugá di Josephine, su di dos nòmber lo por bien tabata ‘responsabilidat’. Tin masha hende ku a traha kuné ku por konfirmá esaki. Asina tantu hende tambe ta gradisidu pa su amistat i su sosten… pa su inisiativanan kreativo i inspirador… Semper tabatin algu den su tapara kultural. Su interes a kubri un kampo ekstenso di tema i tópiko. E tabata konvensí ku su kontribushon na pais tabata puru i di balor.
Reina di Hulanda a honr’é meresidamente ku e distinshon di Kabayero den órden di Oranje Nassau, pa su kontribushon na pais riba tereno sosial i kultural, i el a selebrá e echo akí na su kas, ku famia i hopi amigu, na 1976. Mavis tabata un pal’i muhé. Un mama, modelo pa su sinku yunan. Den e inkontabel aktividatnan kultural ku el a desplegá, el a mustra ku ehèmpel…, ku su integridat ta sinónimo di su personalidat. E tabata intensamente i orguyosamente katóliko.
Un detaye chikitu di su hospitalidat i kreatividat…: Tabata su kustumber invitá dos o tres amigu pa bin kibra yuna kuné na su kas, bièrnèsantu atardi. Tur aña un otro grupo chikitu di amigu tabata na bùrt. Mi tabatin e privilegio di partisipá huntu ku Mavis na hopi evento kultural ku el a organisá na Kòrsou, i nos dos a representá Kòrsou na e Konferensia Mundial di Mujeres Demócrata Cristianas na Caracas, tempu di Presidente Caldera, i na Porto-Riko, durante e último Festival di Pablo Casals, chelista, kaminda nos por a promové Kòrsou via radio i televishon. Tabata na dékada setenta, tempu nos pueblo tabata buska pa mediante aktividatnan kultural mustra un kara propio, loke pa algun hende a nifiká refleho eksklusivo di e kontinente afrikano, pero den buki di lei di Mavis ku mi, nos no a rechasá banda di e refleho ei ku sigur meresé su lugá, e ekspreshonnan internashonal ku por sigui alimentá rikesa kultural di nos pueblo, hasi nos pais, presisamente pa e diversidat akí, mas riku.
Anto es ta un yu Mavis tabata pa su mama! Shon Ros! Tur shon Ros su tres yu muhénan por sierto a resultá bon yu p’e. Muchanan dediká, orguyoso tambe di nan tata Pablo ku a inkulká den nan, norma i balor di den e komunidat akí di nos. Mavis por a papia ku un smak di Mami ku Papi…! El a stima tantu su famianan djaserka komo esnan djaleu.
Anto… es ta un mama pa su yunan! Miguel, su esposo kende 15 aña pasá bai su dilanti, tabata p’e ku su yunan un sosten balioso, i Miguel a dun’é e trankilidat pa e por tabata mama i tur espasio pa a la bes el a traha apashonadamente den kampo kultural pa komunidat. E tabatin e abilidat di mustra kon orguyoso e ta ku logro di su sinku yunan i nan kompañeronan di bida, sin broma, pasobra a parsemi ku el a komprendé ku humildat ta un adorno presioso si e manifestá den su proporshon hustu. I bida a duna Mavis hopi motibu pa e ta gradisidu. Hopi fruta ku el a kosechá di loke ku konvikshon e mes a planta.
Su mayor plaser durante su último añanan tabata… dediká tur tempu na su yunan, nan kasá i e ñetunan. Nos sa, pasobra e tabata kompartí su goso ku su amigunan. I providensia a laga ku e por tabata presente ora su ñetu Kimberly a gradua komo enfermera na prinsipio di aña pasá. E portrèt huntu ku e aviso den korant ta prueba di e Mavis kontentu ku nos ke sigui kòrda. I providensia a spar e di un tratamentu médiko infernal, promé ku el a bai.
Mavis a despedí dia 8 di mart, dia Internashonal di hende muhé, i fecha di nasementu di Don Juancho Evertsz, persona ku mashá el a atmirá i stima. Mechi su presensia semper a papia p’e, i di igual manera su ousensia lo sigui papia p’e den tur loke e tabata gusta i tur loke tabata disgust’é. Mavis su despedida ta un gran pèrdida pa nos tur, pero memoria di e hende ku nos a konosé, ku nos tabatin e privilegio di sinti nos di dje, lo keda biba tanten nos tin bida. Ku su rekuerdonan i ehèmpel sirbi nos tur di konsuelo ta mi mas ferviente deseo.
Mavis de Lannoy-Berg a emprendé su último biahe – su lus no t’ei mas, su inteligensia, su presensia elegante ni su lustre no t’ei mas – pero su memoria lo no blikia nunka.
RSS
Facebook
Twitter
