Dwight Isebia – Wardando karta
Lantando tur maínta
for di kama, pa sinta pensa
kiko hasi hinter día,
lugá di tira bista riba kaya,
wak auto pasa y hende kana,
wardando un bendita karta,
ku aínda no tin fin di yega,
El a hasta haña gana
di kwe piedra pa bai benta,
kibra bentana di bisiña,
ku a tribi di bisa su amiga,
ku ta mihor e kibra kunele,
pasobra damsita asina bunita,
lo por a haña hòmbu fasilmente
pa dunele renchi ku diamante,
loke su frèi pober y desempleá
no por kumpra pa regalele:
Pero el a pensa, y maske ya
e tabatin piedra den su man,
a disidi di no bai kibra mas
ku loke el a kibra kaba,
y sigui warda numa riba karta,
tirando bista riba kaya,
wak auto pasa y hende kana
RSS
Facebook
Twitter
