Pierre Lauffer – E pieda di Anaclara
‘Te mas den kabes di seru tin masha konenchi’. Juan e fitó a splikami, ora m’a puntr’e unda ta miho pa mi jag. Ku su man tur na kajo el a munstrami un seru ku tabata basta mas haltu ku e otronan. ‘Ei riba ta jen. Pero tin un kos ku mi ke pidi mi shon………’. Juan a keda ketu un ratu i wak swela.
‘Ta kiko ta e kos anto?’ m’a puntr’e, pasobra ja m’a bira masha kurioso.
‘Ora mi shon jega den kabes di e seru ei’, el a sigui papia, i su stem tabata emoshona, ‘mi shon lo mira un pieda di sababa grandi banda di un palu di kibrahacha. Pa fabor di Dios, no mishi ku e pieda ei, pasobra ta un pieda santu’.
‘Ta unda b’a sali ku pieda ta santu?’ m’a grita hari.
‘E pieda ei ta santu sigur’, e kier a konvensemi. ‘E pieda di Anaclara ta un pieda santu. Si kwalke hende mishi ku e pieda ei, anto nunka mas nos lo hanja awaseru’.
Mester ta ku Juan a mira kon inkredulo mi kara tabata, pasobra el a sigui papia ku ainda mas konvikshon, sigun e tabata bati su garoti riba swela.
‘Tur hende den e partinan aki sa ku e pieda di Anaclara ta santu. E kos ei a sosode hopi tempu pasá, den tempu di katibu. Mi tawela tabata mucha dia ku Anaclara a subi bai shelu for di e pieda ei’.
‘Pero kon?’
‘Owel, e kos ta asina aki’, Juan a sigui kontami. ‘Ofelia tabata un muhe katibu. Tur dia e tabata sinta den fresku pariba di su kas, ku su uniko ju Anaclara riba su skochi. Ei den sombra di su kas, bow di ramada, e tabata konta su ju kwenta. Kwenta di Nanzi, di Shon Arei, di Shi Maria.
Anto riba un dia, ora e mucha a mira nubianan ta drif bai pabow, el a puntra su mama: “Mamai, ta angel eseinan ta?”
E mama di ku ne: “No, mi ju. Angelnan tambe ta blanku, pero muchu mas bunita. Eseinan ta nubia”.
“Di unda e nubianan ta bini, Mamai?”
“E nubianan ta bini di Dios. Awor nan ta blanku. Pero ora tur hende trata bon, anto Dios ta hasi e nubianan shinishi. E ora ei nos ta hanja awaseru”.
“Unda Dios ta biba?”
“Masha lew, mi ju, te tras di e serunan ei. E kaminda pa jega serka Dios ta masha largu, muchu mas largu ku di kunuku pa Punda. I e kaminda ta seku, jen di tera, jen di pieda. No tin pos kóntra di kaminda, ni palu di shimaruku. Pasobra bo mester sufri sedu. Hendenan ku ta kamna bai serka Dios, no por tin pargata ni sanbarku na nan pia. Pasobra Dios ke pa bo pia ta jen di sumpinja ora bo ta bai serka dje. I sodó mester seka manera sálu riba bo frenta, ora bo jega riba e plenchi grandi rondo di Dios su kas.
Riba e plenchi ei kada hende ta hanja un ramada. Ei semper ta hasi fresku. E ora ei nunka mas nan no tin mester di kamna kaminda lew, pa bai hala awa na pos. Pasobra kontra di kada ramada tin un pos, jen di awa. Anto Dios ta pasa na kada ramada serka e hendenan. E mes ta saka sumpinja for di nan pia i e ta laba tur nan kurpa ku awa fresku. Semper Dios ta kamna ku un koto, jen di kumínda masha dushi. Esei e ta parti pa tur hende, tur dia, anja den anja afo. Nunka e kumínda no ta kaba”.
“Mi por bai serka Dios?” e mucha a puntra su mama.
“No, mi ju, ainda no. Dia bo bira mas grandi, bo deseo pa bai serka Dios lo bira masha grandi, ora bo mira kon hende bibu tin rabia riba otro”.
E mucha no a puntra nada mas. I mientras e mama tabata karisia Anaclara su flektunan, e kriatura a keda wak e kaminda delegaritu di kabritu, ku tabata subi bai ariba, te den kabes di e seru………
Su manise Ofelia a kamna bai na e kama di pushi den kas, kaminda Anaclara sa drumi, pa e lanta su ju. Pero e mucha no tabata ei. Banda di su kusinchi tabatin su popchi di botter, ku kabei di pida kabuja. Ademas e porta di saja ku djèki tabata habrí.Morto spantá Ofelia a kohe e kusinchi di su ju i kore sali pafo.
“Mi Dios, mi ju a pèrdè”, el a kuminsa grita jora. Pasobra Ofelia a kompronde mesora ku su historia riba e kaminda pa bai serka Dios a influensha su ju.
Tur hende a kore sali for di nan kas i bin bòsha den Ofelia su kurá, pa tende ta kiko a pasa. E muhenan tabata borota pio ku prikichi den palu di mango. Pero e hombernan a para tende boka ketu. Ku kara serio nan a laga Ofelia splika nan kiko a sosode.I ora nan a kaba di tende, nan tur a subi seru pa bai buska Anaclara.
Kada homber tabata armá ku un bulpes o un machete.
Anaclara su márkanan di pia a sigui bai riba e kaminda di kabritu te na e pieda di sababa. Ei no tabatin márka di pia mas. Anto riba e pieda di sababa nan a mira e pargatanan kòrá di Anaclara.
Ora e hombernan a weta e kos ei, nan tur a spanta. Jen di miedu nan a gloria nan kurpa i mesora nan a kuminsa baha for di seru. Tabatin den nan ku a kore baha seru asina purá, ku ora nan a jega abow, nan no tabatin rosea mas.
“Unda mi ju ta?” Ofelia a grita, ora el a mira e hombernan ta jega serka. Pero e hombernan no tabatin kurashi di hisa cara i mira Ofelia. Asina nan a konta Ofelia loke nan a mira, nan a kamna manera karne i drenta den Ofelia su kurá. Na tur a jongota kontra di kurpa dje kas, mientras Ofelia ku e otro muhenan a kuminsa jora morto di Anaclara.
Den esei Matias, esun di mas biew den kunuku, a kamna jega. Mesora tur hende a lanta para, pasobra nan tabatin masha respet pa Matias. Henter su bida Matias tabata un bon homber, tantu pa hende komo pa bestia. I ora e papia, ta unikamente pa duna bon konseho o konswelo.
“Nos no mester keha ni jora”, Matias a kuminsa splika nan. “Pasobra e kos aki lo ta Dios su deseo. Ja ta tres anja ku nos no tabatin jobida. Nos magasinanan ta bashi. Tres anja largu nos no por a balia sehú. Tur kabritu ku karne ta flaku. Hopi a muri na mondi. Kisas Dios tabatin mester di sanger inosente komo sakrifisio pa tur malu ku nos a hasi. E sanger di Anaclara lo bira awaseru pa nos. Bira kara boso mira e nubianan pretu ku ja ta bin for di pariba aja. Nan ta manera muhe den su di nuebe luna”.
Tur hende a drei mira kon e nubianan tabata bola bin pabow. I mesora nan tur a keda katu. Ta bio bjentu so a keda supla den e kadushinan kontra di Ofelia su kurá.Matias a kai na rudija; su tras Ofelia ku awa na wowo, i rondo di nan e homber ku e muhenan. Nan a resa, gradisi Dios, mientras awaseru a kuminsa jobe riba nan kabes.
Seis dia largu awa a kai, sin welek, sin bos. Pasobra Anaclara tabatin seis anja. I despues di esei nos a sigui hanja jobida seis siman largu, tur mainta seis or. I ora awaseru tabata kai, nan tabata mira un nubia blanku chikitu, ku tabata keda kologa net riba e pieda di sababa riba seru’.
Juan a dal un rosea grandi, i ami mester a keda ketu, pasobra frankamente mi no tabata sa kiko mi bisa.
‘Ta pesei ningun hende no mester mishi ku e pieda di Anaclara’, Juan a finalisa e historia. ‘E ta un pieda santu. Mi ta spera ku mi shon lo tira hopi konenchi. Pero korda riba nos, ora mi shon jega den kabes di seru. I no mishi ku e pieda’.
M’a gradisi Juan i kuminsa subi e seru poko-poko, ku mi skopet den mi man. Pero mi por a sinti ku tras di kada bentana di e kasnan den e kunuku tabatin hopi wowo ta siguimi, morto spantá, pa mi no mishi ku e pieda di sababa santu di Anaclara.
[uit de bundel van Pierre Lauffer, Kwenta pa kaminda. Met illustraties van Charles Corsen. De Wit, z.p. [Oranjestad] 1968. Nu integraal gedigitaliseerd te vinden op de DBNL, klik hier.
RSS
Facebook
Twitter
Zie laatste regel:
Laatste woord, hier, ontbreekt de doorverwijzing.
Klik waar?