blog | werkgroep caraïbische letteren

Pabien Dr. Elis Juliana

pa Anthony Haile

Willemstad – Último lunanan nos boka ta yen di Un Bon Yu’i di Kòrsou. Wèl ayera nochi Kòrsou ku hopi orguyo  tabata testigu di ken ta un bon yu’i di Kòrsou i kon orguyoso nos por ta di e bon yu’i di Kòrsou aki ku tin un Kuríkulo asina amplio ku hasta ta parse imposibel kon un hende por posee tur e kualidadesnan aki.
 
Ayera nochi durante un seremonia sumamente impreshonante, Universidat di Antia a konsedé e titulo di Doctor Honoris Kousa na nos kerido i estimado Òmpi Elis. For di ayera nochi Òmpi Elis meresidamente por karga ku tur orguyo e titulo di Dr. Elis Juliana. Tur presente a keda masha impreshoná di e forma sereno i na nivel ku henter e seremonia a tuma luga. 
 
Despues di e parti  kaminda a entrega Dr. Elis Juliana e akta di nombramentu i e toga korespondiente e lauradio mes a dirigí palabra. Den un forma humilde pero hopi impreshonante Dr. Elis Juliana a gradisí pa e honor i na mes momento a enfatisá ku grandesa di un hende ta sinta den balorá e kosnan chikitu di bida.  Dr. Elis Juliana  apesar di su 85 aña a keda skerpi manera semper i ketu bai ta duna rekonosimentu na tur nos grandinan ku a dun’é masha hopi informashon ku e na su turno por a usa den su obranan. Hopi di su poesianan, kuentanan tin mensahenan ku te dia di awe ketu bai ta bálido.  Òmpi Elis ta  esun ku a hasi Haiku popular den nos lenga Papiamentu. 
Un di e kosnan masha importante den bida ta ku bo ta duna un hende su honor na momento ku  e mes por disfrutá di esaki. Den e konteksto aki ta di apresiá ku Kòrsou por tabata testigu di e honor grandi ku Universidat di Antia a duna Dr. Elis Juliana awor ku e tan a bida.  Al kontrali hopi ta kere ku a tarda mes pa duna Òmpi Elis e honor aki. Ohalá esaki lo ta un enpuhe  pa nos sigui den e kaminda aki pa duna nos mes hendenan ku meresé esaki nan honor miéntras nan tan a bida. 
Despues di e parti ofisial a sigui un parti kultural hopi bunita ku  kanto,  poesia i músika di piano. Sr. Fifi Radermaker  a presentá un poesia ku a kousa hopi “furor” ku tabata “Mi Tera” ku un kontenido hopi fuerte i ku te dia di awe ketu bai ta bálido. 
Ta duele ku  nos planta di televishon ku ta yama su mes planta nashonal, Telecuracao,  no a pasa henter e seremonia aki Bibu i direkto. Foei Telecuracao, mi ta sigur  ku pueblo a keda desapunta. 
Pabien Dr. Elis Juliana. Bo a haña un rekonosimentu sigur masha bon meresí i nos tur ta sigur ku pueblo di Kòrsou ta para kompletamente tras di e doktorado aki.

Your comment please...

  • RSS
  • Facebook
  • Twitter