blog | werkgroep caraïbische letteren

Noticia mas alentador di aña 2021

Nombramento di un caya na honor di e gran Arubiano sra. Laura Simona Wernet-Paskel (1911 – 1962) na madre patria Hulanda                

Pa prome biaha den historia di Aruba

Sin duda alguno esaki pa nos redaccion Solo di Pueblo ta e noticia cu a causa mas sensacion y tambe e noticia mas alentador di aña 2021 unda cu Hulanda, esta e colegio di Burgemeester y Wethouders di e municipio Den Haag, a asigna un caya na nomber di un gran Arubiano di siglo 20, esta sra. Laura Wernet-Paskel, den feliz memoria.

Laura Wernet-Paskel

Decision di Gemeentebestuur di Den Haag ta argumenta tres aspecto di Laura su bida: maestra, escritora y politica. E decision di Gemeentebestuur di Den Haag di dia 31 augustus 2021, no. DSO/10126558, ta menciona na punto 7:a ,Laura Wernet-Paskel como autor, maestra di scol y prome politica di su isla, cu un argumentacion y aclaracion:

VII. de naam Laura Wernet-Paskelhof, Laura Simona Wernet-Paskel (1911-1962), schrijfster, onderwijzeres, eerste politica op Aruba, met straatcode 22071 toe te kennen aan de nieuwe openbare ruimte, als aangegeven op de bij dit besluit (kenmerk DSO/10126558 van 31 augustus 2021) behorende, en als zodanig gewaarmerkte tekening Naamgeving Openbare Ruimte met tekeningnummer DSO.GI.323;

Esaki ta yena nos como Arubiano cu gran orguyo y satisfaccion pasobra primeramente e ta algo historico pa nos pais y tambe cu e persona aki merecidamente a haya un reconocemento te na Hulanda despues di casi 60 aña di su fayecimento. Na Hulanda nos por compronde cu e Arubianonan residencia aya a keda sumamente contento cu e decision aki y nan ta spera tambe cu di awor en adelante mas Arubianonan, kendenan den pasado a nifica hopi pa nos isla tambe por bini na remarca pa un reconocemento como tal.

Maestra

Sra. Laura Wernet-Paskel, como unico Arubiano a ricibi cohuntamente cu 7 otro escritoranan famoso Hulandes, tur den feliz memoria, e nombramento di un caya na Hulanda den un bario completamente nobo cu ta keda na Den Haag, pa nan meritonan ariba e tereno di literatura y tambe como profesional. Sra. Laura Wernet-Paskel no a destaca solamente como escritora pero tambe como e prome maestra Arubiano kende a gradua na Hulanda na aña 1931 y tambe como e prome persona femenino kende a subi un lista politico na aña 1949. Sra. Laura Paskel na aña 1931, esta cu 20 aña di edad ya caba a gradua den no menos cu 5 idioma y tabata un di e prome maestra Arubiano cu tur e diplomanan aki.

Segun Solo di Pueblo por compronde di famia Wernet e desvelo di borchi cu e nomber di Sra, Laura Simona Wernet-Paskel lo bai tuma lugar den transcurso di otro aña of kisas mas despues pendiente di e trabounan di construccion cu ta tumando lugar den e bario nobo na Eskamp, cerca di Den Haag. En todo caso manera cu Solo di Pueblo ricibi e noticia grato aki for di Hulanda nos lo informa esaki na tur nos lectornan. Siguramente Solo di Pueblo lo haci acto di presencia na Hulanda momento cu e acto historico aki bai tuma lugar.  

Escritora

Si nos tira un bista un rato den su buki “Ons Eilandje Aruba” nos ta topa cu algun temanan hopi interesante cu sra. Laura a pone ariba papel un 80 aña pasa, esta durante e segunda guerra mundial y cu a hala nos atencion masha hopi mes y cu ta concerni un topico hopi actual.

Ariba pagina 35 di su buki ”Ons Eilandje Aruba”, nos Isla Aruba, bou di e capitulo di tempo di esclavitud, nos ta topa cu e siguiente frase: “De Arubanen zullen nooit een hechte eenheid vormen; ze denken teveel aan zich zelven; de een gunt de andere niets.” Na Papiamento: E Arubianonan nunca lo forma un unidad estrecho; nan ta pensa mucho ariba nan mes; esun no ta concedi e otro nada. Laura ta sigi scirbi: ‘t is wel een zeer moderne gedachte; het heilige ego als middelpunt, maar bij de Arubaan wijst ’t veel meer op een volkomen gebrek aan naastenliefde. Zelfbeheersing? Dat woord bestaat niet eens in het woordenboek van de doorsnee Arubaan.

Politica

Den e dianan aki e escritura di e maestra Laura ta pone nos pensa masha hopi mes. E tabatin rason si of no momento cu ela pone esaki riba papel. Ta keda na nos cada uno pa tin un opinion ariba dje pero nos di Solo di Pueblo ta comparti totalmente e opinion di e maestra aki. Segun version di nos bieuwnan sra. Laura Wernet-Paskel, na momento cu ela dicidi di subi un lista politico pa eleccion di Staten pa Antiyas na aña 1949 a confronta cu masha hopi dificultad pa motibo cu e pensamento di antes di nos Arubianonan ta cu politica ta solamente pa hende homber y no hende muher. Akinan pues ta na unda cu e barera di discriminacion a wordu kibra y unda cu e hende muhe a cuminsa haya mas derecho akinan.

Solo di Pueblo tambe tabatin e grato honor di sera conoci cu e buki di e gran escritora famoso Hulandes. esta sra. Dra. Els Koek kende na aña 2013 e publica e famoso buki: ”1001 vrouwen in de 20ste eeuw”; 1001 muhernan den siglo 20.

Ariba e projecto di e buki aki a traha no menos cu 250 experto hulandes y entre nan e experto di Aruba esta sr. Wim Rutgers, den cual nan ta describi e bida di 1001 muhernan kendenan ya a fayece y cu nos no tin cu lubida. E buki cu ta consisti di no menos cu 1611 pagina y nos a keda tur sorpresa di mira cu na pagina 919 nos ta topa cu e biografia di nos yiu di tera, esta sra. Laura Wernet-Paskel entre e 1001 muhernan famoso di siglo 20. Ta pa nos tur como gran Arubiano duna honor na e hecho aki pasobra esaki tambe ta algo historico pa nos pais.

Pa finalisa Solo di Pueblo un biaha mas kier extende su cordial felicitacion na e pueblo Arubiano cu e nombramento di un caya na Hulanda na un gran yiu di tera, esta sra, Laura Wernet-Paskel, den feliz memoria y ban spera cu aki na Aruba mes nos por sigi e bon ehempel cu Hulanda a tuma. Nos felicitacion na cada uno kendenan di un of otro manera a contribui na e gran obra aki.

(Dit artikel verscheen 28 december 2021 in Solo di Pueblo)

Your comment please...

  • RSS
  • Facebook
  • Twitter