Joe Fortin – Un poema
Un poema cu ta nace na canto di nos lama
riba un atardi fresco prome cu solo baha
skirbi cu pasion riba e santo blanco muha
dorna cu cocolishi y scuma transparente
pensamentonan y palabranan yena cu memorianan
di un tempo den un pasado prome cu nos presente
secretonan y confesionnan atrapa pa e biento
caricianan di miradanan cu lo bira recuerdo
sentimentonan expresa cu silencionan entre frasenan
promesanan di eternidad cu ta subi yega cielo
rastro di pasonan marca banda di un troncon naufrago
den un silencio cu ta sambuya den e awa salo
ideanan cuidadosamente pensa cu ta ser pospone
pa kisas wordo realisa den un otro reencuentro
un poema skirbi den e santo blanco canto di nos lama
prome cu un ola tristo a bin pa guli tur e palabranan.
San Nicolas, 15-02-2016
RSS
Facebook
Twitter
