E bida literario di Aruba di e periodo di Statuut, 1954 te aña 2015
Cu hopi orguyo y placer Fundacion Editorial Charuba, conhuntamente cu Biblioteca Nacional Aruba, ta presenta e publicacion mas nobo di dr. Wim Rutgers “Balans, Arubaans letterkundig leven: De periode van Autonomie en Status Aparte, 1954-2015”. E presentacion ta tuma luga diamars 4 di april, di 8:00pm pa 10:00pm, den cura di departamento Arubiana situa den Bachstraat 5.
Den transcurso di 40 aña Wim Rutgers a tene hopi presentacion y a skirbi un cantidad di articulo tocante literatura di Aruba. E articulonan aki, literario critico y literario historico, a keda publica den diferente medio di comunicacion, tambe den revistanan y tomonan literario. Su contribucion literario semper a cana hunto cu su actividadnan den enseñansa.
El a duna les na Colegio Arubano, na Instituto Pedagogico Arubano (IPA), Universidad di Aruba, tambe mas despues na Universidad di Antiya Hulandes/University of Curaçao.
Su grupo meta semper ta e lector interesa den literatura y e studiante. Na aña 1994 Wim Rutgers a logra su titulo di doctor cu e tesis ‘Schrijven is zilver, spreken is goud; oratuur, auratuur en literatuur van de Nederlandse Antillen en Aruba’.
‘Balans’ ta un coleccion di articulonan cu ta ilustra e desaroyo di historia di literatura di Aruba den e periodo di 1954 pa 2015. E buki lo ta na benta e anochi di presentacion y e ta obtenibel na e diferente librerianan. ‘Balans’ ta un publicacion di Editorial Charuba y a keda realisa e. o. cu sosten financiero di Prins Bernhard Cultuurfonds Caribisch gebied.
Presentacion ta di 8:00pm pa 10:00pm cu un programa interesante y varia cu ta conta cu colaboracion di sra. Alice van Romondt, sr. Ronny Severing y un grupo di amante di teatro y literatura bou direccion di sra. Olga van Bochove. Departamento Arubiana/Caribiana ta situa na Bachstraat # 5, Oranjestad.
RSS
Facebook
Twitter
