Philip A. Rademaker – Poema
Ayera nochi den mi soño
m’a mira Tula su pòtrèt.
Nèchi, tur na flus ku dashi
bon pegá, mashá kokèt.
Anto ora ku m’a bòltu
lesa kiko tin patras,
ela skirbi pa mi lesa:
“Ya mi n’ta katibu mas.
Ta p’esnan ku mira esaki
sa ku ya no ta ku chapi
ni machete mi ta traha,
ku m’a studia na Hulanda
i ta traha na kantor,
ku m’a renunsiá pasado,
pone lucha tra’i mi lomba
i ta kore outo awor”.
I den mi soño m’a drai puntra
e otro ami band’i mi;
“Ki’ bo ta kere. Lo ta Tula,
e mes un ku nan a mata
pasó’ el a grita “Libertat”,
òf t’un nobo dj’awendia
ku ke nos lubidá e bèrdat?”
Philip A. Rademaker
RSS
Facebook
Twitter
