Poeta Sonia Ruiz ta presenta Curason
Biblioteca Nacional Aruba tin e placer pa invita pueblo di Aruba pa un presentacion di buki di Sonia Ruiz titula Curason. Sonia Ruiz ta un poeta biba na Hulanda. Tur aña e ta bin ‘cas’ un rato pa celebra carnaval hunto cu famia y amigonan.
Na 2012 Sonia Ruiz a presenta su obra di poesia Nos Rosa na biblioteca. Y un aña despues su di dos coleccion titula Barbulet. Awor e ta cla pa presenta Curason.
E presentacion ta tuma lugar na biblioteca diamars 17 di februari, 7or y mey di anochi.
Nos por lesa kico poeta y autora Olga Orman a skirbi tocante e obra aki riba portada: “Den e tomo aki Sonia ta habri un scref di su curason pa nos pa por comparti no solamente su sentimentonan, pero tambe tur loke e ta encontra den su bida y e lesnan cu el a saca afo. Nos por lesa den ‘Curason’ con Sonia ta maneha su experencianan a base di su sentimentonan, intuicion y conocemento adkeri. Nos ta mira Sonia para duro den su sapato, sigiuendo su rumbo escohi cu paso firme….” (Olga Orman, sept. 2014).
Sonia Ruiz met rechts van haar Olga Orman. Foto © Michiel van Kempen
Den Nos Rosa Sonia Ruiz a traduci su sentimentonan y recuerdonan di Aruba den su poesia. Temanan ta deseo, ser mama, e buskeda pa balansa, y sentimentonan di loyalidad entre otro. E ta sinti semper un laso estrecho cu su isla natal, cu e ta yama “Aruba, e perla di mi bida”.
Den e di dos coleccion Sonia Ruiz ta sigui riba e temanan di Nos Rosa. Riba e portada di e obra nobo ainda por wak e rosa pero awor tin un barbulet riba dje. Kizas e sentimentonan di e poeta ta keda simbolisa pa un barbulet?
Cu Curason ta completa un trilogia di obra di poema cu ta cerca di su curason y cu e kier comparti cu mucho gusto cu otro. Tur hende ta bon bini dia 17 di februari pa 7or y mey na edificio central di Biblioteca Nacional Aruba den George Madurostraat na Playa.
RSS
Facebook
Twitter
